فى الفترة اللى فاتت دى اتعلمت دروس كتييير...........
اتعلمت ان ممكن شخص واحد بالنميمة يضيع ناس كتير .. يضيع عائلة بحالها
فعلا الانسان ممكن يبقى وحش اوى
و ممكن يبقى جاهل

بس تعرفوا .. مش الشخص ده لوحده هو المسئول .. كذا حد ساعده من غير قصد .. لما صدقوا الكلام من غير ما يتأكدوا .. لما نقلوا الكلام بحسن نية .. لما نسيوا ان دى مش اول مرة يعمل كده

بس أكبر غلط انهم نسيوا ان ربنا قال

"إن جاءكم فاسق بنبإ فتبينوا"

"اجتنبوا كثيرا من الظن إن بعض الظن إثم"

و نسيوا ان الرسول عليه الصلاة والسلام قال

"لا يلدغ المؤمن من جحر مرتين"

"كفى بالمرء كذبا أن يحدث بكل ما سمع"

يمكن لان المشهد و انت فيه مختلف عن لما الواحد يكون واقف بعيد
بس ده برضه مش عذر مقبول

التعليم عن طريق التجربة و الخطأ يشترك فيه الانسان مع بعض الحيوانات
انما الانسان بس هو اللى ربنا اختصه بالقدرة على انه يفكر و يعرف الغلط من غير ما يقع فيه .. من قبل ما يقع فيه

يبقى لما نعرف ان الله و الرسول نهونا عن حاجه مش لازم نستنى لما يحصل الضرر عشان نبطلها
لان الوقاية خير من العلاج

يمكن دى حاجات بديهية بس انا كتبت الكلام ده عشان افضل فاكراه جايز ينفعنى او ينفع اى حد لو اتعرض لموقف مشابه
ما احنا بنتعلم طول السنه و نيجى قدام المريض نبقى مش عارفين نعمل ايه!!

وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ

الايه دى من الايات اللى بحبها جدا

فيه اوقات الدنيا بتقفل فيها و تبقى عارف ان التسلسل المنطقى للاحداث هيوصل لنهايه مش سعيده

تبقى ناوى ان مهما الموضوع اتعقد هتحاول ترضى ربنا

و فجأه تلاقى المشكله اتحلت من عنده

و الاجمل انك بإذن الله هتاخد ثواب على نيتك الطيبه مع انك معملتش حاجه

ربنا بيقول "أنا عند ظن عبدى بى"

يا ريت يبقى عندنا حسن ظن بربنا

و يا ريت كمان يكون عندنا رصيد من المواقف دى نفتكره وقت اللزوم عشان يصبرنا و يثبتنا

أبدأ ِبإيه

كتير بنتوه عن طريق ربنا .. بنبعد .. الدنيا بتاخدنا ..

و نفوق

نحب نرجع

فنسأل نفسنا .. أبدأ منين .. و ازاى

أبدأ بالاتزام فى اللبس

و لا بعدم الكذب

و لا بالصدقة

و لا بصلاة النوافل

تفتكروا نبدأ بإيه

أنا عاوزة حاجه أقدر أعملها و فى نفس الوقت تكون انجاز يشجعنى على الاستمرار و صعود السلم

أنا شايفه ان أول حاجه نبدأ بيها هى

الخشوع فى الصلاه

دى أصعب حاجه فى الصلاه بس هتسهل كل حاجه تانية

اذا قدرنا نخلص قلوبنا لربنا و لو لدقائق هى مدة الصلاه نكون قطعنا خطوة لا بأس بها فى الطريق الى الله

و من تقرب الى الله شبرا تقرب الله اليه ذراعا كما أخبرنا الحديث القدسى

انتو بأه رأيكم ايه

تفتكرو الواحد يبدأ بإيه