أجمل حاجة فى الدنيا ان الواحد يحس ان ربنا معاه ..
يستشعر وجود ربنا معاه طول الوقت ..
احساس بالأمان و السكينة ملوش حل ..
من غير قلق ..
من غير هم ..
ساعات حاجات بتحصل .. تخلينا مش عارفين نتصرف ازاى .. و نعمل إيه
أمشى ورا قلبى .. و لا ورا عقلى؟
أختار راحتى .. و لا راحة ضميرى؟
قرارى ده صح و لا غلط؟
المشكلة ان ده كله فى علم الغيب ..
ممكن الواحد ينسحب و هو فاضل له خطوة واحده على هدفه ..
و ممكن يفضل يحارب .. و يكتشف بعدين ان هدفه ده كان وهم .. كان سراب ..
يبقى أعمل إيه؟؟
دايرة مفرغة .. مفيش خروج منها غير بطريقة واحدة ..
إن الواحد يتوكل على الله ..
ساعتها نظرته للأمور بتختلف ..
يبقى احساس جميل اوى ..
انا مش عارفة انا رايحة فين .. بس مطمنة ان ربنا معايا ..
احساس القلق .. بيحل محله إحساس بالترقب ..
كل اللى بيجيبه ربنا خير ..
يا ترى ايه الخير اللى جاى ؟؟
ايه المفاجأة الحلوة اللى هتحصل إن شاء الله ؟؟؟؟
و عشان نتوكل على الله .. محتاجين نشوف صفاته و أفعاله فى حياتنا ..
عشان كده لازم نتعلم نشوف صفات ربنا حوالينا ..
الرحيم ..
الحكيم ..
مالك الملك ..
و لازم نخلى غيرنا يشوفها ..
ده جزء من الدعوة إلى الله ..
و ممكن لما نساعد حد يشوفها نفرج همه .. و مبروك علينا تفريج كربة من كرب يوم القيامة ..
مهم أوى .. اننا ندور على حكمة ربنا فى الحاجات اللى بتحصل لنا و حوالينا ..
فرقت معايا كتير من أول ما اتعلمت ده فى مدرسة الحب فى رمضان اللى فات ..
و أنا لسه فى الأول ..
لسه فيه حاجات كتير مش باخد بالى منها ..
بس ربنا بيبعت لى ناس تعلمنى .. و حاجات تخلينى اخد بالى ..
الحمد لله